في المدرسة (بالدارجة الجزء1).. بقلم : آمال نبورد

 بقلم  آمال نبورد

من بين ذكريات لي مزالة محتفظة بها..اول يوم فالمدرسة..انا مزالة مكنتيقش راسي وخا كنتفكر هاد نهار بكل تفاصيل ديالو..واش بصح كنت هكا..
ناري غي سمعت بابا كال لماما غنرد..تقرى ليلة كاملة ديال لبكية ليلة كاملة ونا كنتسطا بوحديتي..كنت كنكول لبابا سافي دغيا طلعت ليك فراس باغي تهنا مني باغي تلوحني هههه..انا مبغيتش نرجع نقرا أش غندير بلقراية انا بغيت نرعى ؤ نكلس معاكم منمشي فين...

مسكين مخلا مكال عيا ميشرح ليا وتكول تقت فشي كلمة من داكشي لي كال ليا..كنت عارفة حاجة وحدة باغي يفرقني مع ماما..كنت دايرة فبالي بلي لي كيمشي لمدرسة كيسمح فمو ؤ باه..

كنت كتعود ليا حتا ماما الله يرحمها..على هاد نهار..بقوة لبكى نعست بين حضانها بكري عييت بلغوات..فصبح فقت انا لولا مشيت تخبيت ليهم فبيت ديال دجاج.. (طنواتش)

ملي فاق بابا بدا كيقلب عليا مخلا فين قلب والو لوكان ما ختي صغيرة لي عرفات فين كنكلس كاع ميلقاوني..حيت ملي كنت كنلعب معاها قشقش كنتخبا ليها تماك..

خرجتني ماما من داك البيت بحال لي تكولو خرجات شي دجاجة تدبح ليها.. علا والو كان غيضربني بابا.. دخلتني مام لبيت غي بسيسة ؤ تعاود ليا على المدرسة رها زوينة..غتلقاي معا لبنات تماك ؤ ديري صحابات..كلت ليها برك علية غي ختي صغيرة معندي مندير بلابنات..غلبتني مسكينة غي ملي جبدت من واحد البليزة حوايج جداد..كانت ديك البليزة كتحلها ماما غي فلوقت المناسب ؤ غي باش تجبد منها شي حاجة مهمة..مهم لبساتني ماما حوايجي جداد ؤ عطاطني واحد الفولار زوين ؤ لي أول مرة غتلبسني شي حاجة منغير سباط دميكة فرجلي.. بدات كتكولي هيهاي على بنتي غتولي معلمة..بدات شوية شوية كتطلع ليا ديك ضحكة بسيف لي كنخاف نندم عليها..

هز بابا الحالة المدنية كالي يلاه..شد ليا فيدي هبطنا فطريقنا لمدرسة..غادية فطريق كنقلب فراسي على شناهية المدرسة..كيدايرة هاد المدرسة..عارفة حاجة وحدة كيقراو فيها ولكن ماشي بحال الجامع..كترات عليا الاسئلة..مهم كولو ساعة في الجحيم وها..تسطية وها...

ديك ساعة مكانت لتلفزة لا والو..راديو كان بابا كيشعلو غي ملي كيديرو الاخبار..شكون اجاوب على اسئلة ديالي..دبا دري صغير امشي اقير راسو فالمدرسة بلا باه..

وصلنا ل ادارة كنترعد..دخلنا عند المدير البيرو كيداير دكشي مجهد بزاف ؤ مرتب..واحد التصويرة كبيرة دلمليك قريب اخرج منها..مشحال دالملفات عندو..بداو كيهدرو بلعربية مفهمتش أش كانو كيكولو كاع..حريرة هادي مع هاد المدرسة..حاول يهدر معايا المدير شتو ديك لحشمة لي كانت فيها فسوق ضربوها فعشرة كالسة على الكرسي مكنبانش تزيزينت حادرة راس اسي المدير والله منهدر بلا متعيي راسك هههه..كولو سافي هرابت من ديك الادارة بقاو تماك غي حواجي شاد فيهم بابا هههه..

سلا لهدرة مع المدير يعني موافق اقيدني حيت العمر فيتا سن لي ميسمحوش بيه.. عطاه واحد الملف كاليه عمرو من الجماعة خرجنا بحال خرجت من الحبس..باينة لعمى هاد العربية غتعقدني فسصحتي..مشينا نعمرو داك الملف..

غادية معاه كنكول ياربي ميقبلونيش يا ربي..الفكرة لي خديتها على المدرسة غالطة..ولا حبس ماشي مدرسة..مهم دخلنا لجماعة عمرو لينا داك الملف..واحد الموظف شاف فيا كالسة على الكرسي مكنتحركش قرا فيا بلا خايفة..كالي بريفية ابنتي متخافيش المدرسة زوينة غتعلمي فيها ؤ تكبري تولي لينا شي معلمة ولا استادة..فخاطري جوبتو أشمن زوينة كيخدو دراري صغار من مواتهم ؤ كتكولو زوينة..

رجعنا عند المدير عجبني غي داك دروج لي تماك نطلع ؤ نهبط فيه...عطاه داك الملف شافو الدير لقاه هو هداك بقاو غي تصاور كاليه حتال منبعد ؤ جيبهم ليا..عطا لبابا ورقة.. كالو الى بغيتي تدخلها دبا راه قسم ديالها كاين دبا..هبطنا المدرسة معانا المدير انا دخلت من الباب ديال ساحة بديت كنجر يدي من يد بابا باغا نهرب حاسة بلا غندخل ؤ منخرش(حيت مفهمتش شنو كالو فالادارة)..بابا حالف فيا هاد نهار حتا ادخلني..وصلنا القسم خرج المعلم هدرو معاه معرفتش شنو كالة ليه ةلا شنو كال ليهم..شدني من كتفي دخلني لقسم و سوق ديال لولاد ؤ لبنات شديت واحد الغوت حتا سمعني بابا..هدر معايا المعلم مكنفهمش اش كيكول..دخل بابا كالي هانا معاك متخفيش.. دخلني حتا كلسني فطبلة ؤ دموع كيهبطو بحال الواد..كالي بابا سافي متبكيش انا نتسناك بارا ملي تسالي لقراية نطلعو بحالنا..كنت خايفة ؤ كاع مكنتيق فهدرتو..رتحيت شوية ملي كالي نرجعك لدار..المهم خرج بابا ونا بقيت فطبلة لور مخبية مكنبانش كاع..بقيت هكاك حتا خرجنا بحالنا..
 

اول درس خديتو داك نهار وهو خاصني نغلب الخوف..شوفو صعوبة لي كنا كنواجهوها غي معا نفوسنا..كيفاش كتكون البنت ولا الولد قبل متدخل تقرى.

يتبع ..