كونطرا للطاليان واللا لإسبانيا تتقام على المغاربة عامة والريافا (اكزناين) خاصة بغسيل الفندق وهي فالأصل ما ساوية حتى 160 درهم ولكن الشناقة ما خطاو حتى قنت وهوما سبب الزيادات.
دبا داك الطالياني لي عندو شركة واحتاج للخدامة ميمكنش يخدم عندو طاليانيين بحالو حيت غادي يطلبو ليه صالير طالع ومكيرضاوش يخدمو أصلا فقطاعات بحال الفلاحة.. داكشي علاش كيبدا يقلب على يد عاملة رخيصة.
المغاربة معروفين فأروبا كيخدموا ودمارة بهاد العبارة .. عاطين صورة مزيانة من هاد الناحية ومعروفين بالمعقول إلا القلة القليلة لي كتافهم باردين!
مول الشركة ولا صاحب الحقل الفلاحي كيمشي لمكتب الهجرة كيديكلاري ليهم بطريقة قانونية على أنه محتاج ل 10 أشخاص من خارج أوروبا باش يخدمهم تحت لواء عقود موسمية يعني كونطرات ديال 6 شهور وكيخلص الواجبات لي عليه كتبقى رمزية.
كيخلص على كل كونطرا واحد Timbre ساوي 16 أورو يعني دوك 10 دناس الكونطرات ديالهم كاملين كيتقاموا عليه ب 160 أورو .. كينوض الباطرون كيكلف شي مغربي صاحبو باش يجيب ليه بنادم ثقة من المغرب وهنا كيبداو ألعاب العقل والخفة.
كيشدهم خونا المغربي كيبيعهم لمغربي أخر بحالو ب 10 مليون جملة ماهاز ما حاط .. لاخور لي شرا كينزل المغرب كيبدا يصرفق ف عباد الله كيف بغا وهي غادا.
داكشي علاش كنسمعو كونطرا ب 8 ب 9 مليون وبنادم مسكين واصلة فيه لعظم كيبيع الذهب ديال مو أو مراتو ويتسلف ويتكلف.. وحيت باقي ف بالو أن أوروبا هي ليلدورادو.