إنغميسن نإكزناين
صدر واحد البلاغ عن جمعية اكزناين للتنمية كتخبر فيه الرأي العام الكزنايي أنه بتاريخ 2022/11/26 غادي دير جمع عام بجماعة ابورقباثن باش تبدل المسؤولين ديال المكتب التنفيذي والمجلس الاداري ديالها.
هاد الجمعية التي كانوا كيوصفوها بالجمعية رقم 1 باكزناين وقعات فيها بزاف ديال المشاكل وتصفية الحسابات السياسية بين بعض المنخرطين ديالها الشيء اللي جعل الكثير من الكوادر ديالها خارج المغرب وداخله رجعات اللور .
السؤال المطروح حاليا هو واش هاد الجمعية غادي تستاطع تجمع الشمل من جديد ؟؟
الى رجعنا لمضمون البلاغ اللي صدر عن جمعية اكزناين واللي كتخبر فيه بانعقاد الجمع العام باش تجدد الهياكل ديالها يوم,السبت 26 نونبر 2022 ،ما كنلقاوش بزاف ديال المعلومات والتفاصيل اللي مهمة فأمور بحال هادي .
وبالتالي فشح المعلومات كيطرح علامات استفهام كبيرة،وخلا بزاف ديال المهتمين على مواقع التواصل الاجتماعي إما كيسولوا بلا مايلقاوا الاجوبة أو كيشكوا فالأمر؟؟
شي وحدين سولناهوم قالوا لينا:
للمسؤولين ديال الجمعية على الأقل كانوا يحطوا اسماء اعضاء اللجنة التحضيرية والارقام ديال الهواتف ديالهوم باش نسولهوم على بعض الامور اللي كتهم اللوجستيك وعلى المبيت واش كاين بالنسبة للناس اللي بعاد،وعلى النقل ،وعلى الكثير من الأمور.
واحد الفاعل جمعوي آخر طرح مسألة القانون الاساسي ،وقالينا ،الى كان هاد القانون غادي يتغيروا فيه شي احوايج فكان على المسؤولين يحطوا مشروع القانون من دابا،او يسيفطوه في الخاص او فمجوعات الواتساب باش يطلعوا عليه الناس قبل وباش يوجدوا الاقتراحات ديالهوم،لأنه كولشي عارف ان الوقت ما كيسمحش باش يتناقش يوم الجمع العام.
"وياك ما هاد شي فيه إن" يضيف المصدر.
مسألة أخرى في غاية الاهمية وهي شكون اللي من حقوا يصوت يوم الجمع العام،لأنه ما كاين لا بطائق الانخراط لا والو.
مصدر آخر كيقول بأن هاد الطريقة باش كيتم التحضير للجمع العام كتشبه بزاف تشكيل الجمعيات ديال المياه والغابات اللي كتدار فإكزناين!! أي انهم كينوضوا فالصباح كتبان ليهوم يشكلوا جمعية و فالعشية كيصفقوا على اعضاء المكتب وها هوما سالاوا!!!
ايام قليلة اللي بقات على موعد الجمع العام ومازال لم يتبين الخيط الابيض من الخيط الاسود،ما عدا الى كانوا الناس القائمين على الجمعية كيعتاقدوا أن حمو قاد بهمو.
ما عمر شي جمعية كبيرة ومعروفة من اكزناين ترأساتها سيدة!!
المرأة الكزنايية موجودة على رأس جمعيات صغيرة وعلى رأس تعاونيات وعلى رأس لجان الى غير ذلك،ولكن كرئيسة لجمعية محترمة مازال ما تحققش هاد الحلم.
بزاف ديال الناس كيطرحوا هاد السؤال
وكيقولوا علاش ما يجربوش اكزناين هاد الطريق خاصة وأن العمل الجمعوي فالمنطقة ديالنا ما مشاش بعيد مقارنة بباقي مناطق المغرب بحال سواسة مثلا اللي الكثير من جمعياتهوم كيترأسوهوم سيدات.
صحيح أن العقلية الذكورية هي الطاغية عندنا،ومازال كاين اللي كيشوف أن المرأة بلاصتها هي الدار او في أحسن الحالات دير شي مهنة تتلاءم وطبيعتها الانثوية....
ولكن ما ننساوش أن الكثير من اكزناين اللي الداخل واللي على برا تجاوزوا هاد العقلية،خاصة فاش شافوا بزاف ديال سيدات المنطقة مشاوا بعيد ونجحوا فالمهام ديالهوم .
هذا موضوع خاصنا نفكروا فيه كاملين.
وتحية للمرأة ديال اكزناين اللي خدامة واللي كالسة فالدار واللي فيها الام والجدة والاخت والبنت والزوجة....
ملحوظة: كنطلبوا المسامحة من الكثير من السيدات خاصة الفاعلات فمختلف الميادين اللي فوق راسنا وعينينا وما حطيناش الصور ديالهوم فهاد التدوينة ،ماشي لأنهم ما يستاهلوش ولكن حيت ما عندناش تصاورهوم.
صور لرؤساء سابقون للجمعية ، وكذا العنصر النسوي الإجزنائي النشيط جمعوياً، سياسياً، حقوقياً، وثقافياً...
