مقالات| يوميات في سوق بورد - بالدارجة (الجزء 1) .. بقلم : أمال نبورد

  بقلم : أمال نبورد

ليوم لرباع...ليوم سوق..ليوم نعاود ليكوم واحد المقتطف من حياتي..على سوق بوريد..

بحال اليوم كان بنسبة ليا بحال شي مهرجان و لا شي ملتقى كبير..

كنت كنوجد ليه يومان قبل...ليلة ديال السوق كنت كنبات بلا نعاس بقوت الفرحة لي كنحس بيها...النعاس كيطير وتكول كيدور ف ساحتي...مع لفجر غي كنسمع بابا هز المقراج باش يتوض كنوض كنلبس حوايجي لي سبنت قبل ؤ كاديتهوم...

بابا مكانش كيديني معاه بزاف لسوق.. داك الصبح هدرت مع ماما تكول لبابا نمشي معاه حيت انا منقدرش نكولها ليه فوجهو كنحشم منو بزاف...

صلى يايا دخلات عندو ماما كالتها ليه..بطبيعت الحال كدبات عليه شوية... كالت ليه راني وصيتها تجيب شي حوايج و تبيع شي بيضات...خرج الواليد لقاني فلباب على برى مهدرش معايا تما فهمت بلا موافق...

مشا لكوري خرج واحد الحولي بغا يديه لسوق ابيعو... والله العظيم داك الحولي الى صحيح حسن من لحمار ديالنا...عطاطني ماما ديك السلة(ذسوجيت) فيها 35 بيضة بلدية لي دارت بيها غي سبا وها..باش نبيعها حتا هي...

ركب بابا على لحمار ؤ جار من موراه الحولي ونا تبعاه من لور بواحد لعصا كنضرب فيه باش يمشي...

الصراحة ديك لوقت كانت حلوة بزاف..وخااااااا...

ظلام ؤ ضوو دصياح مزال مطلع...هبطنا فديك الطريق لمكدا...فين ما كانت شي حجرة تعكلت فيها ديك سبرديلة ديال ميكة بقات فيا ههههه...والله لوكان ما ديك السلة دلبيض(ذسوجيت نذمجارين) لي كتخليني نزير راسي لوكان طحت وحد 5 دلمرات على اقل هههه

ملقيت راحتي حتا وصلنا لصبيطار لقديم...تماك بدا كايبان ليا البشر كيتحرك...ناس هابطا لسوق...كول وحد شنو جار.. ؤ كول واحد علياش راكب...

دخلنا لدوار بقوة الحشمة لي فيا راسي غرستو فلارض و عينيا وصلو لنواة ديال لارض..قربنا للباب دسوق وقف بابا..نزل على لحمار ربطو تماك على برا...قبل من دخلو لسوق سمسرى دارو دورا لبابا كايساوموه ف لحولي...بيني ؤ بينكوم مكينش لي خصر البيع ؤ شرى من غير سمسرى...كيستغلو الكسابا مساكن...بابا معجبوش الثمن لي عطاو ليه على برى.. كال لهم غنمشي لرحبا الداخل...

بابا مسكين مكانش عارف بيلا تافقو السمسرى بناتهوم على الثمن... الثمن لي كيعطيو برا السوق ماشي هو لي كيعطيو الداخل...يعني كيعطيو ثمن على برى معين..كيوهمو بنادم زعما الثمن طايح على سوق لداخل.. هو كيدخل لرحبة كيتبعوه هدوك لي ساوموه ؤ كيدورو بيه سمسرى لوخرين كيعطيو لو الثمن ناقص على لي عطاو ليه برا...من بعد كيرجعو عندو هادوك السمسرى لوالا كيعرضو عليه نفس الثمن ربع ؤ عشرين الف ريال...

ملي دخلنا لرحبا عرفت بلا غيديروها بيه بابا مسكين غي نية و درويش...ضارو بيه دوك الشفرا حتا عطا لهم الحولي بثمن لي بغاو هما...تكول كانو خلاوه عندو اربيه لهم الشفرى الله ياخذ فهم الحق....

منبعد مشا معايا بابا لداك السيد الله ارحموا شيباني عور هو ومراتو كانو كيشريو البيض ؤ دجاج ؤ بيبي ؤ حتا لقنية فباب السوق لفوقنية...بعنا ليه داك البيض ب درهم.. عطاني سبعمية دريال شديتها فيدي لفرحة شداتني من ودنية وخا فلوس قليلة ولكن كانت كتفرح ؤ كتخلي لقلب اطير بالفرحة...

انا غي ضارو دوك السمسرى.. لبابا صافي بقيت حاضي غي هما ؤ كنشوف تحرميلت ديالهم..مكنتش كانشوف فسوق ؤ شنو فيه حتا سلينا البيع...

بابا باع الحولي و نا بعت البيض سافي دبا نتسوقو على راحتنا...ؤ نشريو لي بغينا...

كان سوق مزال مطلع عليه نهار عامر بناس..باش دير دورى فسوق خاصك جوج سوايع...انا كنت كنحماق على لحليقية ؤ دوك ناس لي كيجيبو دوك الالعاب...

مكنتش كنحمل دوك النصابا لي كسبيعو دوك لحجوبا ؤ داك لعشوب ؤ دوك السحرى ...

يتبع ...